"Андижон" бугун навбатдаги трансферни амалга оширди.

Жамоа ўйинини янада кучайтириш мақсадида Босния ва Герцеговинадан тажрибали футболчи Мирзад Механович таклиф қилинди ва у билан шартнома имзоланди.

1993 йилнинг 5 январь куни таваллуд топган ҳужумкор ярим ҳимоячи жамоанинг айни пайтда Тожикистонда бўлиб ўтаётган ўқув-машғулот йиғинларига қўшилди.

Механовичнинг охирги клуби Босниянинг "Радник Биэлина" ҳисобланади. У ерда 16 та ўйинда 2 та гол урган ва 8 та голли пасни амалга оширган.

Умуман олганда, Мирзад фаолияти мобайнида "Млада Болеслав" (Чехия), "Колин" (Чехия), "Подбрезова" (Словакия), "Варнсдорф" (Чехия), "Яблонец" (Чехия), "Фастав Злин" (Чехия), "Ордабаси" (Қозоғистон), "Аш-Шола" (Саудия Арабистони), "Тузла Сити" (Босния ва Герцеговина)" ва "Радник Биэлина" (Босния ва Герцеговина) клубларида тўп тепган.

Ҳозирга қадар Механович 265 та ўйинда майдонга тушиб рақиблар дарвозасига 52 та гол урган ва 63 та голли пасни узатган.