Бутунжаҳон бокс иттифоқи (WBC) якунига етган 2024 йилнинг энг яхши эркак ва аёл боксчиларини аниқлади.

Супероғир вазн тоифасида WBC, WBA, WBO ва IBO йўналишларида амалдаги жаҳон чемпиони Александр Усик 2024 йилнинг энг яхши боксчиси деб топилди. Украиналик ўтган йилнинг май ойида британиялик Тайсон Фьюрини мағлуб этиб, WBC камарини қўлга киритган ҳолда мутлақ жаҳон чемпионига айланганди. Декабрь ойида эса у реванш жангида ҳам камарларини муваффақиятли ҳимоя қилди.

Скай Николсон эса WBC томонидан 2024 йилнинг энг яхши аёл боксчиси сифатида эътироф этилди. Австралиялик 29 ёшли боксчи ярименгил вазн тоифасида WBC чемпиони ҳисобланади. У ўтган йили асосий рақибалари Сара Маҳфуд, Дайан Варгас ва Рэйвен Чепменни катта устунлик эвазига мағлубиятга учратди.