«Барселона»нинг қанот ҳужумчиси Ламин Ямал Испанияга қайтгач, аэропортда «Реал» футболкасини кийган боланинг биргаликда суратга тушиш илтимосини қабул қилди. Аммо у суратга тушиш пайтида қўли билан «Қироллик клуби» эмблемасини ёпиб қўйди.

12 январь куни Саудия Арабистонида Испания Суперкубоги финал учрашуви бўлиб ўтди, унда «Барселона» «Реал»га қарши тўқнаш келди. Ўйин каталонияликлар фойдасига 5:2 ҳисоби билан якунланди. Ушбу ўйинда Ямал 22-дақиқада «қаймоқранглилар» дарвозасини ишғол қилди.

Жорий мавсумда Ямал барча мусобақаларда 23 та учрашувда иштирок этди, уларда у 8 та гол ва 12 та ассистентликни амалга оширди. Унинг клуб билан амалдаги меҳнат шартномаси 2026 йил ёзигача мўлжалланган. Transfermarkt порталида келтирилган маълумотларга кўра, футболчининг бозор қиймати €180 млнни ташкил этади.