Ҳимоячи Кайл Уокер жорий мавсумнинг қолган қисмини "Манчестер Сити"дан ижара асосида "Милан"да ўтказади.
Жума куни 34 ёшли футболчининг трансфери расман тасдиқланди. Журналист Бен Жейкобснинг сўзларига кўра, "россонерилар" англияликни 5 миллион еврога сотиб олиши мумкин - бу вариант ижара шартномасига киритилган. Шунингдек, футболчи А Серия гранди билан 2027 йилнинг ёзига қадар мўлжалланган ва тўлиқ трансфер қилинган тақдирда кучга кирадиган шартнома борасида олдиндан келишиб олгани маълум.
Кайл Уокер 2017 йилдан бери "Манчестер Сити"да ўйнаб келмоқда. У барча мусобақаларда "шаҳарликлар" сафида 319 та ўйин ўтказган.
