Жанубий Корея миллий терма жамоаси ҳам Ливанга қарши ўйинга тайёргарликни БААнинг Дубай шаҳрида олиб бормоқда. Улар якшанба куни Байрутга учиб кетишади. Кореяликларнинг Англия чемпионатида тўп сурувчи икки нафар футболчиси — Ким Бо Кюнг ("Кардифф Сити") ва Ли Чунг Йонг ("Болтон") терма жамоанинг Ливан устидан ғалаба қозонишига шубҳа қилмаётганини таъкидлаб ўтди.

Ўтган йили Кореяда бўлиб ўтган ўйинда майдон эгалари Ливанни 3:0 ҳисобида мағлуб этишганди. Ўшанда 2та голни ярим ҳимоячи Ким Бо Кюнг уришга муваффақ бўлганди.

"Мен ҳамиша гол уриш ҳақида ўйлайман. Бу сафар ҳам менда бундай имконият юзага келса, яна гол уришга ҳаракат қиламан", дейди Ким Бо Кюнг.

Ушбу футболчи "Кардифф Сити"нинг Чемпионшипдан Премьер-лигага чиқишига ёрдам берди. Ким Англиядаги фаолиятини у қадар яхши бошлай олмаганди. Кейинчалик қанотдан ярим ҳимоя марказига ўтказилганидан кейин вазият бутунлай ўзгариб кетди. Авваллари у терма жамоада ҳам қанотда ўйнаганди. Бу сафар эса у марказга ўтказилишини кутмоқда.

"Марказда кўпроқ фойдам тегади, деб ўйлайман. Ўйин услубимизга кўра, мен кўпроқ ҳужумнинг сўнгги қисмини якунловчи ёки ҳужумчиларни тўп билан таъминловчи бўлишим керак", дейди ярим ҳимоячи.

Ли Чунг Йонг эса "Болтон" билан Премьер-лигага чиқа олмади. Ушбу жамоага 2009 йилда қўшилган футболчи "Болтон" яна бир йил тўп суришни режалаштирмоқда.

"Ливан тиришқоқ жамоа. Биз ўйин давомида шошилмаймиз. Ўзимизнинг нималарга қодирлигимизни кўрсатсак бўлгани. Ливанни мағлуб этишга тайёрмиз.