"Монако"нинг янги хужумчиси Радамель Фалкао ўзининг "Атлетико"даги фаолияти ҳақида якуний хулосаларини баён этди. Футболчининг фикрлари клуб расмий сайтида эълон қилинган.
"Ортга назар ташлаб шуни айтишим мумкинки, мен Мадридга клуб учун муҳим ўйинчи бўлиш учун келгандим. Ўз олдимга "Атлетико"га совринларни ютишда ёрдам бераман деб мақсад қўйгандим. Мана ўша мақсадларимизга эришдик, энди ушбу даврни бемалол ижобий баҳолашимиз мумкин. Испания чемпионатида рақобат кучли, бу ерда чемпион бўлиш осон эмас. Бироқ биз охирги икки мавсумда унутилмас муваффақиятларга эришдик. Бу худди бир тушга ўхшайди. Ушбу икки мавсум фаолиятимдаги энг яхшилари бўлди.
Масалан, Испания кубоги. "Реал" билан ўйинлардаги бир неча йиллик мағлубиятлардан сўнг ҳам Испания кубогини қўлга кирита олдик. Бу жуда ажойиб бўлганди. Бизда тарихни ўзгартириш, соврин ютиш ва бу ютуқни "Реал" стадионида нишонлаш имконияти бор эди. Бу ютуғимизни ҳеч ҳам унутиб бўлмайди. Уни авлодлар ҳали кўп эслаб юришади.
"Атлетико"даги барча-барчага қўллаб-қувватлаганликлари учун миннатдорчилик билдираман. Бугундан бошлаб "Атлетико"га узоқдан бўлсада мухлислик қиламан. Катта раҳмат", дейди Фалкао.
Эслатиб ўтамиз, у яқинда "Монако" билан беш йиллик шартномага имзо чекди. Футболчи трансфери учун француз клуби 60 миллион евро сарфлашига тўғри келди. Шу тариқа, Фалкао Франция чемпионатининг барча замонлардаги энг қиммат футболчисига айланди.
Ўтган мавсумда хужумчи "Атлетико" сафида Испания чемпионатининг 34 ўйинида майдонга тушиб, 28та гол муаллифига айланди.
