"Реал" рахбарияти ҳамон "ПСЖ" бош мураббийи Карло Анчелоттини жамоа бош мураббийлигига тайинлаш масаласида бош қотирмоқда, дея хабар беради испан матбуоти.
Маълумотларга қараганда, Париж клуби Анчелотти ўрнига Франция терма жамоаси собиқ бош мураббийи Лоран Бланни олиб келмоқчи. "ПСЖ" президенти Носир Ал-Хелаифи Блан билан учрашув ўтказган ва у билан бир келишувга эришгани айтилмоқда. Шунингдек, томонлар ўртасидаги шартнома фақат бир йилга мўлжаллангани ҳам қистириб ўтилган. Таҳминларга қараганда, ушбу келишув Анчелоттининг "Реал"га ўтишини тезлаштириши мумкин.
Эслатиб ўтамиз, "қироллик клуби" бош мураббийлиги ўрнига аниқ номзод ҳали тасдиқланганича йўқ. Кўпчилик ушбу лавозимга Анчелоттидан ташқари бу мавсум "Бавария" билан тўртта совринни қўлга киритган Юпп Хайнкес ҳам асосий давогарлардан бири сифатида кўришмоқда.