"Ал-Аҳли" Роберто Фирминони Саудия чемпионати учун ўз таркибидан чиқариб ташлагани ҳақида аввалроқ хабар берилганди.

Инсайдер Фабрицио Романонинг фикрича, бразилиялик ҳужумчи ўрнига Вендерсон Галено рўйхатдан ўтказилган.

"Ливерпуль"нинг собиқ футболчиси фақатгина Осиё чемпионлар лигаси учун таркибда қолмоқда.

«Goal» хабарига кўра, Фирмино энди "Ал-Аҳли"нинг режаларида эмас. Клуб қишки трансфер ойнасида футболчи билан музокара олиб боришга умид қилганди, бироқ бразилиялик келган таклифларни рад этди.

Фирмино клуб билан 2026 йилнинг июнига қадар тузилган шартномасидан воз кечмоқчи эмас. Унга кўра, футболчи ойига тахминан 1,7 миллион евро маош олади.

Жорий мавсумда бразилиялик футболчи Саудия Арабистони лигасида 17 та ўйин ўтказиб, 5 та гол урди ва 3 та голли узатмани амалга оширди.