Жорди Альба Хавьер Маскеранонинг "Интер Майами"га бош мураббий этиб тайинланиши ҳақида гапирди.

40 ёшли мутахассис клубни 2024 йилнинг ноябрида қабул қилиб олганди.

"Барселона"да ўйнаганимизда дўст эдик. Биз майдонда ёнма-ён эдик, аммо энди муносабатлар ўзгариши керак. У мураббий ва биз унинг айтганларини ҳурмат қилишимиз керак.

Ўшанда ҳам Маскерано мураббий бўлиши аниқ эди. У ҳар доим ўзига ва бошқаларга жуда талабчан ва жуда юқори талабларни қўйган.

Жамоадоши сифатида у ажойиб эди ва ўзининг табиий позициясида ўйнамаганига қарамай, "Барселона"га кўп ёрдам берди. Бускетс у ерда эди, шунинг учун Маскерано марказий ҳимоячи позициясига мослашиши керак эди ва у жуда яхши ҳаракат қилди. У ўша даврдаги барча ёш футболчиларга ўрнак эди.

Аргентина ёшлар терма жамоасида унинг қўл остида ишлаган йигитлар менга унинг жуда яхши мураббий эканлигини, ҳар доим ўз футболчиларини ҳимоя қилишини айтишди. Бу биз учун яхши бўлади", - дейди "Интер Майами" ҳимоячиси Жорди Альба.