Хабарингиз бор, Душанбе шаҳрида аёллар футзал терма жамоалари иштирокида CАФА мусобақаси бўлиб ўтмоқда.

Турнирнинг иккинчи турида Ўзбекистон терма жамоаси Туркманистонга қарши (6:3) баҳс олиб борди. Учрашувнинг "Энг яхши ўйинчиси" деб гол уриб, битта голли узатма етказиб берган сардоримиз Феруза Турдибоева тан олинди.

"Бугун осон бўлмаслигини билардик. Лекин шу билан бирга фақат ғалаба ҳақида ўйладик — биз учун бошқа вариант йўқ эди. Ўйинни яхши бошладик ва тезкор голлар урдик. Кейин бироз бўшашдикми, иккита гол ўтказиб юбордик.

Танаффусда мураббийларимиз кўрсатмалар беришди, нималарга эътибор бериш зарурлигини таъкидлашди. Барчаси яхши эканлиги ва ўз ўйинимизни кўрсатсак, уч очко бизники бўлиши ҳақида гаплашдик.

Натижада, иккинчи бўлимни ҳам гол билан бошладик. Албатта, гол урганим ва Мадинага голли узатма етказиб берганимдан хурсандман. Энг муҳими — ғалаба қозондик.

Олдинда яна иккита ўйин бор. Уларда ҳам ишончли ўйин кўрсатиб, максимал натижа қайд этишга ҳаракат қиламиз. Қолганини вақт кўрсатади.", - деди Феруза Турдибоева.