Сўнгги пайтларда интернет веб-сайтлари ва “Интерфутбол” газетасида “Андижон” жамоасининг собиқ ўйинчиси Қаҳрамон Абдуқодиров тўғрисида турли хил гап-сўзлар тарқалганди. Ҳозирда “Андижон” жамоаси мураббийлар штабида фаолият кўрсатаётган Абдуқодиров бу фикрларга ойдинлик киритди. Бу ҳақда "Андижон" ПФК расмий сайти хабар бермоқда.
“Ҳар бир футболчи майдонга тушганда ўз жамоаси манфаати учун бор кучини ишга солиб ҳаракат қилади. Мен ҳам 1996 йили “Андижон” – “Навбаҳор” жамоалари ўртасида бўлиб ўтган учрашувда андижонликлар сафида майдонга тушиб жамоамнинг ғалабаси учун бор кучим билан ҳаракат қилганман. Ўшанда ўйин 1:1 ҳисобида якунланган ва шу баҳсда пенальтини аниқ амалга ошириб жамоамга муҳим очкони келтиргандим. Миш-мишларга қараганда, пенальти тепилишидан олдин кимдир менга нимадир таклиф қилган экан. Мен ҳақимда билдирилган бу гаплар асоссиз.
Тўғри, “Андижон”дан ташқари “Навбаҳор” клубида ҳам тўп сурганман ва бу жамоага ҳурматим баланд. Бу миш-мишларни журналист нимага асосланиб тарқатгани бизга қоронғу. Аммо яна қайтариб айтаман, бу миш-мишдан бошқаси эмас”, дейди Қаҳрамон Абдуқодиров.
