«Манчестер Сити» мухлислари Мадридга Родри ва «Олтин тўп» тасвири туширилган баннерни олиб боришди.
Бугун «шаҳарликлар» Чемпионлар лигаси чорак финали жавоб баҳсида «Сантьяго Бернабеу» стадионида «Реал» билан тўқнаш келади. Биринчи ўйинда мадридликлар 3:2 ҳисобида ғалаба қозонган эди.
«Этихад»даги илк беллашувда «Манчестер Сити» мухлислари дарвоза ортида Родри «Олтин тўп» билан туширилган баннерни илиб қўйишганди. Унда Oasis гуруҳининг Stop Crying Your Heart Out («Кўзёш тўкишни бас қил») қўшиғидан иқтибос келтирилган эди. Гуруҳ аъзолари Ноэль ва Лиам Галлахерлар «Сити»нинг ашаддий мухлислари ҳисобланади.
El Chiringuito нашрининг хабар беришича, «Манчестер Сити»нинг Мадридга келган мухлислари ушбу баннер нусхасини шаҳар кўчаларида ҳам ёйишган.
Эслатиб ўтамиз, «Манчестер Сити» ярим ҳимоячиси Родри 2024 йил октябрь ойида France Football талқинига кўра йилнинг энг яхши футболчиси совринини қўлга киритган эди. «Реал» вакиллари эса Винисиус Жуниор ғолиб бўлмаслигини билганидан сўнг, «Олтин тўп» тақдирлаш маросимига бойкот эълон қилишган.
