Жанубий Корея ва Ўзбекистон тўқнашувига ҳам мана роппа-роса бир ҳафта вақт қолди. Биз ушбу учрашувга тайёргарлик ҳақида Ўзбекистон мухлислар клуби раиси Абдураҳмон Фозилов билан қисқа савол-жавоб уюштирдик.

— Корея давлатига Ўзбекистондан нечта мухлис бормоқда?
— Биз томондан ташкиллаштирилган гуруҳда 124 нафар.

— Нега биз томондан? Бошқа томондан ҳам борувчилар борми?
— Ҳа, туристик фирмалар ҳам ҳаракат қилишди, лекин улар виза муаммосига дуч келишган. Шунинг учун яна неча нафар мухлис бориши маълум эмас.

— Виза муаммоси?
— Ҳа, виза муаммоси. Ҳозирги кунда Жанубий Корея мамлакатига сайёҳлик визасини олиш катта муаммога айланган. Бизга эса Ўзбекистон футбол федерацияси, ФИФА, ҳамда Ташқи ишлар вазирлигидан сайёҳлик визаларини олишда яқиндан ёрдам кўрсатилган.

— Кореяда сафингизга яна нечта мухлислар қўшилади деб ўйлайсиз?
— 1000дан зиёд. Уларга терма жамоамиз рамзи туширилган оқ футболка ва байроқлар олиб бормоқдамиз.

— Мухлислар Кореяга қачон уиб кетишади?
— 4 ва 5 июнь кунлари.

— Нега бир ҳафта олдин учмоқдасизлар?
— Биз сафар давомида нафақат футбол кўрамиз, балки Корея давлатининг тарихи ва маданияти билан ҳам танишамиз. Бунинг учун Корея бўйлаб саёҳатлар ташкиллаштирилган. Қолаверса, бир ҳафта давомида Кореядаги ўзбекистонлик ва қўшни давлатларимиз футбол мухлисларини бир секторга жойлаштириб, уларнинг бир тану бир жон бўлиб терма жамоамизга мухлислик қилишини режалаштириб қўйганмиз.

Шу ўринда Кореядаги мухлисларга маълумот бериб ўтмоқчиман. Ўзбек мухлислари Сеул шаҳрининг марказида жойлашган "BEST WESTERN SEOUL" 4 юлдузли меҳмонҳонасида жойлашадилар.

— Агар сир бўлмаса, 8 кунлик сафар харажатларининг умумий нархи қанча?
— Турфирмалардан деярли икки баробар арзон, яъни 3.000.000сўм. Бунинг ичига авиачиптадан тортиб, барча сарф-харажатлар кирган.