Жанубий Корея терма жамоасига уч йилдан буён илк марта чақирув олган ярим ҳимоячи Ким Нам Ил Yonhap News мухбири билан суҳбатда ўзининг терма жамоага лойиқ ўйинчи эканлигини яна бир бор исботлаб қўймоқчилигини таъкидлаб ўтди.

Умуман олганда, Ким Нам Илнинг бугунги таркибга киритилиши ҳам кўпчилик учун кутилмаган ҳол бўлди. Таҳминларга қараганда, 36 ёшли футболчи асосан ҳимояга кўпроқ эътибор қаратган ярим ҳимоя чизиғидан жой олади.

Терма жамоа бош мураббийи Чой Канг Хининг фикрича, Ким бугунги ўйинда энг асосий ролни ўйновчи футболчилардан бири бўлади. Тажрибали ярим ҳимоячи ЖАРда ўтган 2010 йилги Жаҳон чемпионатидан буён Корея термаси сафида тўп сурмаган бўлсада, мураббий уни "Кей-лига"даги мавсумни ажойиб тарзда ўтказгани учун таркибга жалб этган.

"Мен ҳали ҳам майдонда эканлигимни ҳаммага кўрсатиб қўйишни истайман. Олд чизиғимизда хужумчи Ли Донг Гук ва қанот футболчиси Ли Чунг Йонг каби бир қатор истеъдодли ўйинчилар бор. Улар билан ўзимни анча дадил ҳис қилмоқдаман", дейди Ким.

Ливанга қарши учрашувда футболчи Ли Мйонг Жу билан тандем ҳосил қилган ҳолда майдон марказидан туриб ҳимоя масьулиятларини ўз бўйнига олади. Биз ҳикоя қилаётган Ким Нам Ил Жанубий Корея ва Япония мезбонлигида ўтган 2002 йилги Жаҳон чемпионатида жавлон ураётган вақти унинг бугунги тандеми Ли атиги 12 ёшда бўлган. Ўшанда кореяликлар ярим финалгача етиб боришган ва Кимнинг ўйини эвазига унга "чангютгич" лақабини беришганди.

Бош мураббий Чой Канг Хининг Ким Нам Ил бугунги ўйинда қандай аҳамиятга эгалиги ҳақидаги фикрлари қуйидагича бўлди: "Ҳам ҳимояда, ҳам хужумда яхши ўйнашимиз керак, аммо ўйинни ярим ҳимоя орқали назорат қилиш ҳам асосий қуролимиз бўлади. Ким рақиб пасларини узиб қўйиш ва тезкор қарши ҳужумларни уюштиришда аъло даражадаги футболчидир. У жамоамизнинг бошланғич ҳимоя чизиғидаги мувозанатни сақлаб тура олади".

Маълумот ўрнида айтиш жоиз, Ким термадаги энг ёши катта футболчи ҳисобланади.