Испания терма жамоаси бош мураббийи Висенте дель Боске "Реал"нинг собиқ устози Жозе Моуриньонинг фикрлари қанчалик ҳақиқатга яқин эканлиги ҳақида гапириб ўтди. Бу ҳақида испан матбуотида хабар қилинган.
Эслатиб ўтиш ўринлики, Испания чемпионатининг сўнгги 38-туридан ўрин олган "Осасуна"га қарши учрашувда бир қатор футболчиларни, жумладан Икер Касильясни ҳам қайдномага киритмаган Моуриньо буни уларнинг ўзлари ўйинга тайёр эмасликларини айтгани билан изоҳлаганди.
"Касильяснинг ўзи майдонга тушишни хоҳламаганини айтганига ишониш қийин. Икерни яхши билгани учун ҳам бунга ишонолмаяпман. Унинг фаолиятида ҳеч қачон бундай камчиликлар бўлмаган. Аммо у билан терма жамоада эканлигимизда бу ҳақида суҳбатлашганим йўқ. "Реал"да нима бўлаётгани ҳақида аниқ ахборотга эга бўлмай туриб бирон нарса дейишдан йироқман. Бу клубнинг ички иши", дейди дель Боске.