"Ньюкасл" ҳужумчиси Александр Исак Англия Премьер-лигасининг биринчи бўлимида "Ноттингем Форест"га қарши ўйинда дубль қайд этди. 33-дақиқада Исак пенальтини аниқ амалга оширган бўлса, 34-дақиқада ўзининг иккинчи голини киритди. Шу тариқа, швециялик форвард Премьер-лигада урган голлари сонини 50 тага етказди.
Манбага кўра, Александр Исак Англия чемпионатидаги элликта голга эришиш учун 76 учрашув ўтказиши керак бўлди. Бу натижа билан Исак турнир тарихида ушбу кўрсаткичга эришган тезлик бўйича еттинчи футболчига айланди.
Премьер-лигадаги дастлабки 50 та голини Исакдан тезроқ урган олти футболчидан фақат иккитаси ўйнамоқда. "Манчестер Сити" ҳужумчиси Эрлинг Холандга Премьер-лигадаги илк 50 та голини уриш учун 48 ўйин керак бўлди. Норвегиялик футболчи рейтингда етакчилик қилмоқда. "Ливерпуль" вингери Муҳаммад Салоҳ ўзининг 72-учрашувида 50-гол киритди.
