«Милан» клуби раҳбарияти Тейани Рейндерс билан янги шартнома имзолашни режалаштирмоқда.

Янги келишувга кўра, 26 ёшли марказий ярим ҳимоячи италияликлар билан шартномасини 2030 йилгача узайтиради. Томонлар келишувга эришгани ҳақида Calciomercato нашри De Telegraaf манбасига таянган ҳолда хабар бермоқда.

Амалдаги шартнома бўйича нидерландиялик футболчининг маоши йилига 1,7 млн еврога тенг эди. Янги битимга кўра, унинг маоши 3,5 млн еврогача ошади, шунингдек, шахсий ва жамоавий мақсадларга боғлиқ бонуслар ҳам кўзда тутилади.

Тейани Рейндерс жорий мавсумда А Серияда «Милан»нинг энг яхши тўпурари ҳисобланади. У чемпионат доирасида 24 ўйинда майдонга тушиб, 8 та гол урган.