Бугун 2014 йилги ЖЧда қатнашадиган иккинчи жамоа номи маълум бўлганидан хабарингиз бор. Австралия билан дуранг қайд этган Япония мезбон Бразилиядан сўнг келаси йилги Мундиалда иштирок этиши аниқ бўлди. Табиийки, учрашувдан кейинги матбуот анжуманида ғолиб жамоа бош мураббийининг кайфияти аъло даражада эди.

Альберто Заккерони (Япония терма жамоаси бош мураббийи): "Мен ўзимни худди ўн ёшга улғайиб қолгандек ҳис қиляпман, аммо саралашдаги иштирокимиздан қувончим чексиз. Японияга терма жамоани ЖЧга олиб чиқиш учун келгандим ва мана бугун жамоа билан бу мақсадимизга эришдик.

Ўйинимиз ҳақида тўхталсам, қисқача қилиб "зўр" таърифини ишлатмоқчиман. Футболчиларим ўйин назоратини ўз қўлларига олиш учун қаттиқ курашдилар ва айтишимиз мумкинки, якунда ғалаба қозондилар!

Ўз халқаро тажрибаси ва кучли жисмоний тайёргарлиги билан Осиёдаги энг кучли жамоалардан бири ҳисобланган Австралияга қарши ўйинда ғалаба қозона олардик ҳам. Аммо бу осон бўлмасди. Рақибимиз катта эътиборни ҳимояга қаратганди. Бу эса футболчиларимни рақиб майдонига киришини қийинлаштириб юборди. Бўш жой топганимизда эса, улар ўз жисмоний кучлари эвазига бизга нисбатан прессинг уюштиришди.

Биз бир хил суръатда ўйин кўрсатдик. Аммо кўпроқ дастлабки 25 дақиқаликда имкониятларга эга бўлгандик. Австралия каби термаларга қарши ўйинларда яратилган вазиятлардан фойдаланмаяпсанми, демак ўзингга ўзинг муаммо туғдиряпсан."