Мадриднинг "Реал" клуби ярим ҳимоячиси Федерико Вальверде жароҳати сабаб 1 март, шанба куни Испания Ла Лигасининг 26-туридан ўрин олган "Бетис"га қарши ўйинни ўтказиб юбориши мумкин. Бу ҳақда «Relevo» хабар бермоқда. Аввалроқ, футболчи бир ойдан ортиқ вақтдан бери соннинг икки бошли мушакларида муаммоларга дуч келаётгани маълум бўлганди.
Манбага кўра, футболчида сон мушаклари шикастланишидан кўра жиддийроқ муаммо бор. Қайд этилишича, Вальверде 4 март куни бўлиб ўтадиган Чемпионлар лигаси доирасидаги "Атлетико"га қарши ўйингача тикланишга шошилмоқда. Таъкидланишича, "Манчестер Сити"га қарши ўйинда футболчи укол орқали ўйнаган.
Вальверде жорий мавсум барча мусобақаларда 40 та учрашувда иштирок этиб, 8 та гол ва 6 та ассистни ўз ҳисобига ёздириб қўйди.
