Эрон ўта муҳим учрашувда ғалабани қўлга киритганидан хабарингиз бор. Терма жамоага бағишланган Эроннинг teammelli.com сайти Карлос Кейруш жамоаси имкониятлари чамалаган ҳолда, таҳлилий мақола эълон қилди.

Эрон учун энг камида учинчи ўринни олиб, "плей-офф"га йўл олиш имконияти деярли нақд. Аммо бу йўлнинг анча мураккабликлари ҳам бор. Жаҳоннинг бошқа нуқтасига учиб бориш ва у ерда анча кучли бўлган терма жамоа билан куч синашишга тўғри келади...

Айни пайтда мусобақа жадвалига қараб реал фикрлаган ҳолда айтиш мумкинки, Ливан ва Қатар ЖЧ йўлланмасидан умидини узиб бўлди. Математика юритиб кўрсак, Қатар учун истисно ҳолатлар йўқ эмас, масалан Эрон "Озодий"да Ливанга имкониятни бой бериши ва кейин Қатарнинг ўзи Ўзбекистонни Тошкентда бешта тўп фарқи билан мағлуб этиши... Очиғини айтганда, қатарликлар ўйиндан чиқди ва энди 2та тўғридан-тўғри йўллама учун курашаётганлар учта қолдик - Корея, Ўзбекистон ва биз.

Келаси сешанба куни икки гуруҳ етакчиларининг баҳсига гувоҳ бўламиз. Эрон "Озодий"да Ливан билан "кўнгилхушлик" қилаётганида, Ўзбекистон Сеулда Корея меҳмони бўлади. Эслатиб ўтамиз, шу йилнинг ўзида Ливанни Осиё кубоги саралашида 5:0 ҳисобида мағлуб этгандик. Ливанни мағлуб этиб 13 очкога эга бўламиз ва Корея пойтахтидаги ўйиндан дуранг натижа кутиб қоламиз. Агар шу таҳминимиз тўғри чиқса, Кореяда ва Ўзбекистонда 12тадан очко бўлади ва Эрон терма жамоаси 13 очко билан гуруҳда биринчи ўринга кўтарилади.

Воқеалар ривожи юқоридагидек кўриниш олиб, 10-тур олдидан Эрон гуруҳда пешқадамлик қилаётган бўлсада, хавотирланиш учун етарлича асос бор: агар терма жамоа Улсанда Кореяга имкониятни бой берса ва Ўзбекистон Қатарни енгса, уларнинг иккаласида 15 очкодан бўлади ва натижада Эрон "плей-офф"га равона бўлади...

Яна бошқа вариантда, келаси ҳафта Сеулда кимдир ғалаба қозонса, ғолибда 14 очко бўлади, мағлуб жамоа эса 11 очкоси билан қолади. Ушбу вариантда сўнгги турда Эрон Кореяга қарши энг камида дуранг ўйнаши талаб этилади.

Умуман олганда, ҳар қандай ҳолатда терма жамоа тўғридан-тўғри йўлланма олиши учун "Озодий"да Ливанни мағлуб этишимиз ва Улсандан камида дуранг билан қайтишимиз лозим.