"Ливерпуль" таркибни тўлдириш бўйича режалар тузмоқда. Ёзда Мерсисайд клубини Луис Диас тарк этиши мумкин, шу боис "қизиллар" ҳужум чизиғини кучайтириш имкониятларини чамаламоқда. «TEAMtalk» хабарига кўра, "Ливерпуль" Диас кетгач, "Милан"дан Рафаэль Леау билан шартнома имзолаши мумкин.
Леаунинг амалдаги шартномасида уни 175 миллион еврога сотиб олиш банди кўрсатилган. Шу билан бирга, "Милан" португалияликни 100 миллион еврога сотишга тайёр бўлади. "Россонерилар" Чемпионлар лигасига чиқа олмаслиги сабабли, Леаунинг трансфери клуб учун ёзги трансфер кампаниясини молиялаштириш имкониятига айланиши мумкин.
Қайд этилишича, Леауни яна бир топ-клуб - "Барселона" ўз сафига қўшиб олмоқчи. Аммо каталонияликлар молиявий қийинчиликка дуч келишмоқда.
