Футбол агенти Дмитрий Селюк ЦСКА ярим ҳимоячиси Аббосбек Файзуллаевни Европа клубларига катта суммага сотиш имконияти ҳақида ўз фикрини билдирди.
"Файзуллаев — яхши футболчи, бу борада ҳеч қандай савол йўқ. Аммо унда жисмоний жиҳатдан етишмовчилик қилади. Бундай ўйинчиларни Испания ва бошқа мамлакатларда кўп топиш мумкин. Лекин Ҳусанов ва Шомуродов бундан фарқ қилади. Масалан, Ҳусанов жуда тезкор ва унинг бўйи қарийб 1,90 метр. Файзуллаев эса техникаси билан ажралиб туради, аммо жисмоний жиҳатдан у қадар бақувват эмас. Аммо ҳар бир футболчининг ўз харидори бор," — деб келтиради Селюкнинг сўзларини "Спорт День за Днем".
Ўзбек ярим ҳимоячиси Аббосбек Файзуллаев 2023 йил августида Москва ЦСКА клубига қўшилган. Жорий мавсумда у 24 расмий ўйинда майдонга тушиб, 3 та гол урди, 6 та голли узатма берди ва 1 та сариқ карточка олди.
Transfermarkt интернет-портали 21 ёшли футболчининг бозор баҳосини 8 миллион евро этиб белгилаган. Унинг "армиячилар" билан амалдаги шартномаси 2025/26-йилги мавсум охиригача мўлжалланган бўлиб, уни яна бир йилга узайтириш имконияти мавжуд.













