Европа Чемпионлар лигаси 1/8 финал босқичидан ўрин олган Англиянинг "Ливерпуль" ҳамда Франциянинг "ПСЖ" клублари ўртасидаги жавоб учрашуви якунига етди. Унда меҳмонлар минимал ҳисобда ғалаба қозонди - 1:0 (4:1 пенальти).
"ПСЖ"га асосий вақтдаги ғалабани 12-дақиқада гол урган франциялик ҳужумчи Усмон Дембеле келтирди. Шу тариқа асосий вақт 1:0 ҳисобида якунланди. Қўшимча бўлимларда гол урилмади. Ўйиндан кейинги пенальтилар сериясида "ПСЖ"нинг қўли баланд келди - 4:1.
Жамоалар ўртасидаги дастлабки учрашув сафарда мерсисайдликларнинг 1:0 ҳисобидаги ғалабаси билан якунланди. Ўша учрашувдаги ягона голни ярим ҳимоячи Харви Эллиот киритганди.
Шу тариқа "ПСЖ" Чемпионлар Лигаси чорак финалига йўл олди. Кейинги босқичда Луис Энрике жамоаси "Астон Вилла" - "Брюгге" жуфтлиги ғолибига қарши баҳс олиб боради. Биринчи ўйин 3:1 ҳисобида инглизлар фойдасига ҳал бўлганди.
