Элит Осиё Чемпионлар Лигаси 1/8 финал доирасидаги “Ал-Ҳилол” - “Пахтакор” учрашуви 11 март, сешанба куни Риёддаги “Кингдом Арена” стадионида бўлиб ўтди. Унда майдон эгалари йирик 4:0 ҳисобида ғалаба қозонди.

Ўйиндаги голларга Ал-Ямий, Малком, Ад-Довсарий ва Носир ад-Довсарий каби футболчилар муаллифлик қилишди. Sofascore портали ўйиндан кейин футболчиларнинг майдондаги ҳаракатини баҳолади. Учрашувнинг энг яхши футболчиси сифатида иккита ассист муаллифи бўлган Муҳаммад Канно деб топилди — 8,7 балл. Майдонда 90 дақиқа ҳаракат қилган ярим ҳимоячи бир қанча вазиятларда жамоасини муқаррар голдан сақлаб қолди ва икки голига ҳаммуаллифлик қилди. “Ал-Ҳилол” сафида энг ёмон ҳаракат қилган футболчи эса Маркос Леонардо бўлди — 7,1 балл.

“Пахтакор” сафида энг яхши ўйин ўтказган футболчи дарвозабон Жонатан бўлди. Бразилиялик посбон 4 та гол ўтказган бўлса-да, 5 марта сейв амалга ошириб, ҳисобни бундан ҳам йириклашиб кетишига йўл қўймади. Портал дарвозабоннинг ҳаракатларини 7,5 балл билан баҳолади.

67 дақиқа майдонда ҳаракат қилган Диёр Холматов эса “шерлар” таркибидаги иккинчи энг яхши футболчи бўлди — 6,5 балл. Ярим ҳимоячи майдонда ҳаракат қилган вақти давомида 32 марта тўпга тегинган. 18 марта шерикларига пас берган бўлса, шулардан 15 таси манзилга аниқ етиб борган. Футболчи ердаги 7 та курашнинг 3 мартасида ютиб чиққан. Холматов 67 дақиқа давомида 1 марта рақиб дарвозаси томон хавфли зарба беришни уддалади.

Абдурауф Бўриев, Абдулла Абдуллаев, Жонатан Лукка каби футболчилар Sofascore томонидан 6,4 баллга лойиқ кўрилди. "Жар"да кечган баҳсда ягона гол муаллифига айланган Фламарион эса “Пахтакор” сафидаги энг ёмон ҳаракат қилган футболчи бўлди — 5,9 балл.

Маълумот учун, ушбу ғалабадан кейин “Ал-Ҳилол” чорак финал йўлланмасига эга чиқди. “Пахтакор эса икки ўйин натижасига кўра мусобақа билан хайрлашди.