"Манчестер Юнайтед" Маркус Рэшфордни сотиш орқали бор-йўғи 20 млн фунт олиши мумкин.

Ҳозирда 27 ёшли ҳужумчи ижара асосида "Астон Вилла" шарафини ҳимоя қилмоқда. Бирмингем клуби футболчи маошининг 75 фоизини қоплайди - у ҳафтасига 315 минг фунт маош олади.

"Астон Вилла"да Рэшфордни 40 миллион фунтга сотиб олиш ҳуқуқи ҳам бор. Бу нархда бошқа клублар ҳам форвардни қўлга киритиши мумкин - аммо ҳозиргидек маош таклиф қилишлари даргумон.

"Юнайтед" Маркусга маошининг пасайишини қоплаш учун маълум миқдорда пул тўлаши керак бўлади, деб ёзади Daily Mail. Манбаларга кўра, товон пули 20 миллион фунтни ташкил қилиши мумкин. Шу тариқа, клубнинг футболчини сотишдан тушадиган даромади икки баробарга қисқаради.

АПЛ жорий мавсумида Рэшфорд 20 та ўйинда майдонга тушди ва 4 та гол урди.