Мадриднинг «Реал» жамоаси ҳужумчиси Килиан Мбаппе «Вильярреал» дарвозасига 2 та гол урганидан сўнг (2:1) Испания чемпионатининг 28-тур ўйинида бразилиялик Роналдонинг мадридликлар сафида дебют мавсумида урган голлари сони бўйича натижасини ортда қолдирди. Энди франциялик футболчининг ҳисобида 31 та гол бор, Роналдо эса 30 та гол урган эди. Килиан ушбу тарихий футболчи билан таққосланишига муносабат билдирди.  

«Роналдо ва Криштиану Роналду – афсоналар. Агар мен Роналдодан кўпроқ гол урган бўлсам ва Криштиану Роналдудан ҳам кўпроқ урсам, бу мен улардан яхшироқ эканимни англатмайди. Бу мен учун яхши мавсум, шунчаки рақамлар. Энг муҳими – совринлар қўлга киритиш, агар совринлар бўлмаса, қолган нарсалар бефойда», – деди Мбаппе «Реал» клубининг телевидениесида.  

Криштиану Роналду «Реал» сафидаги дебют мавсумида 33 та гол урган. Бу кўрсаткич бўйича рекорд эса Иван Самораного тегишли бўлиб, у 37 та гол урган.