Бугун "Олмалиқ" жамоаси аъзоларидан бир гуруҳи Бўка туманида жойлашган Меҳрибонлик уйига боришди.

Ташрифдан мақсад мазкур Меҳрибонлик уйида яшаётган болажонларни кўнглини олиш ва уларга совғалар улашиш эди. Достон Абдураҳмонов, Самандар Шодмонов, Мўйдин Мамазулумов ва Фаррух Нурлибоев, жамоа матбуот хизмати ва маркетинг бўлими, мухлислар клуби вакили, шунингдек, Олмалиқ камолот ёшлар ижтимоий ҳаракати етакчилари болажонларга клуб томонидан ажратилган совғаларни топширишди. Футбол клуби раҳбарияти меҳрибонлик уйида яшаётганлар учун битта стол тенниси, коптоклар ва жамоа размлари туширилган сувенирлар ажратганди.

Бу учрашув Бўка Меҳрибонлик уйи тарбияланувчиларига оз бўлсада, қувонч улашди деб умид қиламиз. Жамоа аъзоларини кузатиш жоғида ёш ўспирин келажакда футболчи бўлмоқчи эканлигини ва ҳар доим Ўзбекистон футболига ўз ҳиссасини қўшиш истаги билан яшаётганлигини тўлқинланиб гапирди ва бу учрашувдан жуда хурсанд эканлигини айтди.

Шу ўринда, жамоа аъзолари уларни уй учрашувларига келиб туришлари ва жамоамиз билан бирга бўлишлари таклифини ўртага ташлади. Умид қиламизки, яқин ўйинларимизда меҳрибонлик уйи тарбияланувчилари футбол томошасига келишади. Келажакда ҳам улар билан дўстона учрашувлар давом этади.