"Интер Майами" футболчиси Лионель Месси янги жароҳати ҳақида фикр билдирди. 37 ёшли ҳужумчи сонини яқинлаштирувчи мушакдан олган жароҳати туфайли Аргентина терма жамоасига март ойида бўлиб ўтадиган ЖЧ-2026 саралашида ёрдам бера олмайди.
"Уругвай ва Бразилияга қарши муҳим ўйинларни ўтказиб юборишим жуда ачинарли. Ўйнашни жуда хоҳлагандим, бироқ кичик жароҳат туфайли терма жамоа қароргоҳига бора олмайман. Ҳар қандай аргентиналик мухлис каби жамоани ташқаридан қўллаб-қувватлайман. Олға, Аргентина!" - деб ёзди Месси ижтимоий тармоқдаги саҳифасида.
Эслатиб ўтамиз, жароҳат "Интер Майами"нинг "Атланта Юнайтед"га қарши якшанбадан душанбага ўтар кечаси бўлиб ўтган ўйинидан сўнг аниқланган эди. Месси гол уриб, "лочинлар"нинг ғалабасига ҳисса қўшди (2:1).
