Германия терма жамоаси бош мураббийи Юлиан Нагельсманн Италия терма жамоаси устози Лучано Спаллетти ҳақидаги саволга жавоб берди.
Германия терма жамоаси Миллатлар лигаси 1/4 финалининг дастлабки ўйинида италияликлар меҳмони бўлади ва уч кундан сўнг ўз уйида "скуадра адзурра"ни қабул қилади.
Матбуот анжуманида журналистлар 37 ёшли Нагельсмандан Италиядаги ёш мураббийлар ва яқинда 66 ёшга тўлган Лучано Спаллеттига нисбатан ишончсизлик ҳақида сўрашди.
"Италияни бу жиҳатдан камроқ замонавий деб ҳисобламайман, бироқ, менинг фикримча, клублар ёш мураббийларга кўпроқ ишонч билдириши лозим. Спаллетти мендан каттароқ, аммо у ажойиб мураббий. Эҳтимол, келажакда Италия терма жамоасига ҳам ёш мураббий бошчилик қилар.
Спаллеттининг футбол ҳақида аниқ тасаввури бор, у "Наполи"да жуда катта муваффақиятларга эришган эди. Лучано раҳбарлигида Италия терма жамоаси ҳам яхши ўйин намойиш этмоқда, ҳужумкор тарзда ҳаракат қилмоқда," дея Нагельсманнинг сўзларини келтиради Football Italia.
