Куни кеча Бразилия терма жамоаси 2026 йилги жаҳон чемпионати саралашида Аргентинага йирик ҳисобда мағлуб бўлди (1:4). Ўйиндан кейин "селесау" бош мураббийини алмаштириш мумкинлиги ҳақидаги гап-сўзлар яна ҳам кўпайди.

Globo Esporte хабарига кўра, Бразилия футбол конфедерацияси учун устувор номзод Карло Анчелотти ҳисобланади. Аммо ҳозир италияликни қўлга киритиш бразилияликларга осон бўлмаслиги аниқ, шунинг учун Б режаси тайёрланди. Манбага кўра, Жорже Жезуш билан музокаралар бошланган.

Қайд этилишича, Жезуш Бразилия терма жамоаси учун клублар ўртасидаги жаҳон чемпионати олдидан "Ал-Ҳилол"ни тарк этишга тайёр бўлади. Бразилия конфедерациясида Жорже Бразилия футболи билан яхши таниш бўлгани учун унинг номзодини юқори баҳолайдиганлар бор.

Ҳозирда Бразилия терма жамоасига Доривал Жуниор устозлик қилмоқда.