Ўзбекистон миллий жамоаси Жаҳон чемпионати йўлланмани қўлга киритиш учун катта қадам ташлади. Темур Кападзе бошчилигидаги жамоани энди БАА ҳамда Қатарга қарши муҳим учрашувлар кутиб турибди. Ҳозирча оптимал бўлиб турган таркибимизда қайси футболчиларимиз карточкалар туфайли юқоридаги ўйинлардан бирини ўтказиб юбориши мумкинлиги ҳақидаги фикрлар кўпчиликни қизиқтириши табиий.
Эронга қарши баҳсда бирорта ҳам ўйинчимиз огоҳлантириш олмагани учун Бирлашган Араб Амирликларига қарши учрашув олдидан бизда дисквалификация ҳолати кузатилмайди.
Ушбу мусобақа қоидаларига кўра, сариқ карточкалари иккитага етган (учрашувларнинг кетма-кет бўлишининг аҳамияти йўқ) футболчи навбатдаги баҳсни ўтказиб юбориши белгиланган. Ушбу саралаш босқичида аввал ошоҳлантирилган вакилларимиздан кимдир 5 июнь куни сариқ карточка оладиган бўлса, ушбу ўйинчи Қатар билан беллашувда миллий жамоамизга ёрдам бера олмайди.
Демак, БАА билан ўйинда эҳтиёт бўлиб ҳаракатланиши керак бўлган футболчилармиз қуйидагилар:
Бобир Абдухолиқов, Аббос Файзуллаев, Руслан Жиянов, Шерзод Насруллаев, Фаррух Сайфиев, Элдор Шомуродов, Отабек Шукуров, Одил Ҳамробеков.
Маълумот учун, Амирликлар жамоасининг икки футболчиси КХДР билан ўйинда огоҳлантириш олди – Абдулла Рамазон ва Яҳё Надьер, бироқ уларнинг иккаласи ҳам сариқ карточкаларни илк бор олгани учун бизнинг ўйинга дисквалификация қилинмайди.
