Италиялик журналист Фабрицио Романо "Ювентус" ҳозирча "Фейеноорд" ҳимоячиси Давид Ганцко билан шартнома имзолашдан йироқ эканини, аммо уни 2 ой олдин жароҳат олган Бремернинг ўринбосари сифатида кўраётганини маълум қилди.

Ганцко аллақачон Италия чемпионатида ўйнаган, аммо унинг "Фиорентина"даги биринчи тажрибаси унчалик муваффақиятли бўлмади, шундан сўнг у чемпионатни ўзгартирди. "Кекса синьора" раҳбарияти словакиялик футболчига йилига 2,5 миллион евро маош билан беш йиллик шартнома таклиф қилган, аммо якунда бошқа клублар томонидан рақобатга дуч келган. Романо уларнинг номини айтмади, бироқ битим барбод бўлиши мумкинлигидан хавотир билдирди.

Нидерландия чемпионатида 27 ёшли футболчи 23 та ўйинда 3 та гол уриб, 2 та голли узатмани амалга ошириб, ҳимоячи учун ёмон ўйин кўрсатмаяпти.