"Реал" ҳужумчиси Килиан Мбаппе "оқлар" сафида дебют мавсумида урган голлари сони бўйича Криштиану Роналдуга тенглашди.
Франциялик футболчи "Леганес"га қарши ўйинда (3:2) иккита гол урди - энди Мбаппеда "Реал" сафида 45 та ўйинда урилган 33 та гол мавжуд.
Роналду Мадриддаги илк мавсумида ҳам шунча гол урганди.
"Дебют мавсумимда Криштианунинг голлари сонига тенглашганимдан жуда хурсандман. У барчамиз учун қанчалик муҳим эканини ҳамма билади ва у менга тез-тез маслаҳат беради.
Лекин энг муҳими, "Реал Мадрид" билан совринларни ютиш", - дея Мбаппенинг сўзларини келтиради Madrid Universal.
