“Машъал” – “Регистон” (5:0) учрашуви якунига етгач, муборакликлар бош мураббийи Александр Хомяков ўз фикрлари билан ўртоқлашди.

- Ўйин тўлиқ бизнинг устунлигимиз остида кечди. Албатта, рақиб жамоада ҳам имкониятлар бўлди, лекин савия борасида барибир шогирдларим устунлик қилишди. Менга якуний ҳисоб ёқди, аммо ўйиндан кўп ҳам қониқиш ҳосил қилмадим. Чунки шогирдларим бу баҳсда тўпни кам назорат қилишди. Биласиз, Кубок ўйинида “Бунёдкор”га қарши саф тортамиз. Сизга айтсам, бугунги ўйинимиз билан “Бунёдкор”га жиддий қаршилик кўрсата олмаймиз, шу боис тўпни назорат қилиш устида кўпроқ ишлашимиз керак.

- Ҳавонинг иссиқлиги ўз таъсирини ўтказдими?
- Унчалик эмас. Тўғри, биринчи таймда ҳаво бироз иссиқроқ бўлди, лекин танаффусдан кейин йигитлар анча эркин ҳаракат қилишди.

- Эртанги режалар қандай?
- Эртага Ўзбекистон терма жамоасини сафарда Жанубий Кореяга қарши жуда муҳим беллашув кутиб турибди. Бу ўйинни бутун жамоа билан томоша қиламиз. Шу ўринда Ўзбекистон терма жамоасига омад ва ғалаба қозонишни тилаб қоламан. Ўйиндан кейин эса кечки пайт машғулот белгиланган. Чунки кейинги ўйинни 13 июнь куни ўтказамиз, шундай экан, йигитларга кун бўйи дам бермоқчи эмасмиз.