"Манчестер Сити" ярим ҳимоячиси Кевин де Брюйне фаолиятини Европанинг бошқа топ-клубида давом эттириши мумкин.
33 ёшли футболчи мавсум якунида эркин агентга айланади - унинг "шаҳарликлар" билан шартномаси узайтирилмайди. Бельгиялик футболчига Саудия Арабистонида анчадан бери талаб бор, аммо Европада ҳам юлдуз хавбекни ўз сафига қўшиб олиш истагида бўлганлар бор. El Nacional нашри тарқатган хабарга кўра, футболчининг трансферига "ПСЖ" клуби катта қизиқиш билдирмоқда.
Кевин де Брюйне ўн йилдан буён "Манчестер Сити" шарафини ҳимоя қилмоқда. Июнь ойида у 34 ёшга тўлади.
