Россиянинг Чампионат нашри ўзбекистонлик икки карра Олимпия чемпиони Баҳодир Жалоловнинг Остона шаҳрида ўтган бокс оқшомидаги чиқишига ўз норозилигини билдирди.
5-март, жума куни Баҳодир Жалолов ҳакамлар қарори билан 36 ёшли украиналик Игор Шевадзуцкий (12-3, 10 КО) устидан ғалаба қозонди. Бироқ бу натижа кўплаб экспертлар орасида салбий қабул қилинди.
Жалоловнинг ҳаваскор боксдаги ёрқин ютуқлари, айниқса, унинг оғир вазн тоифасидаги энг кучли боксчилардан бири мақомини инобатга олганда, бу жангдан умидлар анча юқори эди. Бундан ташқари, Шевадзуцкий жанг ҳақида қисқа фурсатда хабардор бўлган ва жангдан бир кун олдин Қозоғистонга учиб келган эди.
Жалоловнинг ҳозир рингда кўрсатаётган жангларига қараб айтиш мумкинки, у топ даражадаги рақиблар билан рингга чиқса, қийинчиликка дуч келади. Ҳозирча Жалолов камарлар учун курашиш даражасидан анча йироқда.
Баҳодир Усикдан ўрнак олиб, ўз услубини қайта кўриб чиқиши, вақти-вақти билан кучлироқ рақиблар билан жанг қилишни бошлаши керак. Агар у яқин орада Фабио Уордли ёки Мартин Баколе каби рақиблар билан учрашса, бу Жалолов учун яхшилик билан тугамаслиги аниқ, деб ёзди Чампионат нашри.
Таъкидлаш жоизки, Шевадзутский Жалоловнинг кетма-кет 14 та жангда муддатидан олдин ғалаба қозониш сериясига барҳам берди.
Аввалроқ украиналик боксчи жангдан сўнг “Баҳодирга қарши рингда бўлиш — мен учун шараф” дея фикр билдирган эди.
