Rossiyaning Championat nashri o‘zbekistonlik ikki karra Olimpiya chempioni Bahodir Jalolovning Ostona shahrida o‘tgan boks oqshomidagi chiqishiga o‘z noroziligini bildirdi.

5-mart, juma kuni Bahodir Jalolov hakamlar qarori bilan 36 yoshli ukrainalik Igor Shevadzuskiy (12-3, 10 KO) ustidan g‘alaba qozondi. Biroq bu natija ko‘plab ekspertlar orasida salbiy qabul qilindi.

Jalolovning havaskor boksdagi yorqin yutuqlari, ayniqsa, uning og‘ir vazn toifasidagi eng kuchli bokschilardan biri maqomini inobatga olganda, bu jangdan umidlar ancha yuqori edi. Bundan tashqari, Shevadzuskiy jang haqida qisqa fursatda xabardor bo‘lgan va jangdan bir kun oldin Qozog‘istonga uchib kelgan edi.

Jalolovning hozir ringda ko‘rsatayotgan janglariga qarab aytish mumkinki, u top darajadagi raqiblar bilan ringga chiqsa, qiyinchilikka duch keladi. Hozircha Jalolov kamarlar uchun kurashish darajasidan ancha yiroqda.

Bahodir Usikdan o‘rnak olib, o‘z uslubini qayta ko‘rib chiqishi, vaqti-vaqti bilan kuchliroq raqiblar bilan jang qilishni boshlashi kerak. Agar u yaqin orada Fabio Uordli yoki Martin Bakole kabi raqiblar bilan uchrashsa, bu Jalolov uchun yaxshilik bilan tugamasligi aniq, deb yozdi Championat nashri.

Ta’kidlash joizki, Shevadzutskiy Jalolovning ketma-ket 14 ta jangda muddatidan oldin g‘alaba qozonish seriyasiga barham berdi.

Avvalroq ukrainalik bokschi jangdan so‘ng “Bahodirga qarshi ringda bo‘lish — men uchun sharaf” deya fikr bildirgan edi.