"Осасуна" RFEF'нинг Иньиго Мартинес бўйича қарорига қўшилмаяпти.
Эслатиб ўтамиз, "Барселона" 27 март куни Памплона жамоаси устидан 3:0 ҳисобида ғалаба қозонганди.
Эртаси куни "Осасуна" Иньиго Мартинеснинг "Барселона" таркибида нотўғри иштирок этгани учун Испания Қироллик Футбол Федерациясига (RFEF) апелляция берди. Клубнинг фикрича, ҳимоячининг ушбу ўйинда майдонга тушиши футболчиларнинг мақоми ва трансферлари бўйича ФИФА Регламентининг I иловаси 5-моддасини бузади.
Унга кўра, тиббий сабабларга кўра миллий терма жамоага қўшилмаган ёки уни тарк этган футболчи халқаро давр якунланганидан кейин 5 календарь кун давомида ўз клуби сафида тўп тепиши мумкин эмас.
Бугун "Осасуна"нинг Иньиго иштироки бўйича шикояти рад этилгани маълум бўлди. RFEF каталонияликлар регламентни бузмагани ҳақида қарор қабул қилди.
COPE журналисти Альберто Санснинг хабар беришича, "Осасуна" чиқарилган қарордан норози ва апелляция бериш ниятида.
