Лондоннинг "Арсенал" клуби бош мураббийи Микель Артета "Брентфорд"га қарши ўйинда (1:1) Томас Партининг алмаштирилганини тушунтирди.

Ганалик ярим ҳимоячи шанба кунги ўйинда "канонирлар"нинг ягона голига 61-дақиқада муаллифлик қилган бўлса, 69-дақиқада жароҳати гумон қилиниб, алмаштирилди.

"Томас бироз ноқулайлик ҳис қилди, биз унинг соғлиғини хавф остига қўйишни хоҳламадик. Мен ҳали шифокорлар билан гаплашмадим" - деди Артета ўйиндан кейинги интервьюсида.

"Арсенал" 16 апрель чоршанба куни "Реал Мадрид"га қарши Чемпионлар лигаси 1/4 финал жавоб ўйини учун "Сантяго Бернабеу"га йўл олади. Эслатиб ўтамиз, биринчи учрашув лондонликларнинг йирик ҳисобдаги ғалабаси билан якунланганди – 3:0.