Лондоннинг "Арсенал" клуби ярим ҳимоячиси Томас Парти Чемпионлар лигаси чорак финалида "Реал" билан бўлажак ўйин ҳақида ўз фикрлари билан ўртоқлашди.
Жамоаларнинг биринчи учрашуви "канонирлар"нинг 3:0 ҳисобидаги йирик ғалабаси билан якунланди. Жавоб ўйини 16 апрель куни "Саньтяго Бернабеу"да бўлиб ўтади.
"Биз тўп билан ишончли ўйнашимиз ва ўз ўйинимизни ўйнашга ҳаракат қилишимиз керак. Биз нима қилишимиз кераклигини ҳаммамиз биламиз. Мақсадимиз ҳар бир ўйинда ғалаба қозониш ва Мадридга ҳам худди шундай муносабат билан йўл оламиз. "Реал"нинг заиф томонларидан фойдаланиб, ҳужумда давом этишга ҳаракат қиламиз", - деди Парти.
Шанба куни "Арсенал" АПЛ доирасидаги ўйинда "Брентфорд" билан очколарни бўлишиб олди (1:1). Голга айнан ганалик ярим ҳимоячи муаллифлик қилди.
