Ўзбекистон чемпионатининг 5-тури доирасида "Пахтакор" ўз майдонида "Андижон"ни қабул қилди. Учрашув жуда кескин ва драматик тарзда кечди.

Илк бўлимда мезбонлар тўп назоратига эга бўлишди, бир неча бор хавфли ҳужумлар уюштиришга ҳаракат қилишди. Сергеев, Собирхўжаев ва Фламарион каби етакчи футболчилар фаол ҳаракат қилдилар, бироқ танаффусгача ҳисоб очилмади.

Иккинчи бўлимда эса томошабоп футбол бошланди. 53-дақиқада Абдуманнопов "Андижон"ни олдинга олиб чиқди. Ортидан 60-дақиқада Турдимуродов бурчакдан узатилган тўпни голга айлантириб, фарқни икки тўпга етказди – 0:2. Аммо "Пахтакор" таслим бўлмади. 67-дақиқада Сергеев Фламарион ва Ўринбоев иштирокидаги чиройли комбинацияни гол билан якунлади – 1:2.

Бироқ 80-дақиқада Ускоковичнинг голи меҳмонларга янада ишонч бағишлади – 1:3. "Пахтакор" ўйинни қутқариш учун катта куч билан олдинга урила бошлади. 84-дақиқада захирадан майдонга тушган Башар Ресан ҳисобни 2:3 қилиб қисқартирди. Қолган дақиқаларда "шерлар" гол уриш учун бор имкониятларини ишга солишди. 90+5-дақиқадаги стандартдан кейинги вазиятда ҳам гол уриш имконияти бўлди, аммо тўп дарвозага кирмади.

Шу тариқа, "Андижон" Тошкентда сенсацион ғалабага эришди ва ўз очколарини 9 тага етказиб олди. "Пахтакор" эса мавсумдаги тўртинчи мағлубиятини қабул қилиб олди.

Суперлига, 5-тур
"Пахтакор" – "Андижон" 2:3 (0:0)
Голлар: Сергеев (67'), Ресан (84') – Абдуманнопов (53'), Турдимуродов (60'), Ускокович (80')