Испанияда давом этаётган уч миллат кубогининг Испания ҳамда Ўзбекистон ёшлар терма жамоалари ўртасидаги ўйини ўз ниҳоясига етди.

Учрашувда майдон эгалари Испания терма жамоаси 3:2 ҳисобида ғалаба қозонди.

Аввалига вакилларимиз ҳисобни очишган эди. Биринчи тайм тугашига бир дақиқа қолганида Бобурбек Йўлдошевнинг голи терма жамоамизни танаффусга ғолиб сифатида олиб чиқди.

Иккинчи таймда эса майдон эгалари ўзларига келишди. 56-дақиқада Сусо ҳисобни тенглаштирган бўлса, 6 дақиқа ўтиб Рубен Испанияни ҳисобда олдинга олиб чиқди.

Лекин бундан тушкунликка тушиб қолмаган ёшларимиз 68-дақиқага келиб, ҳисобни тенглаштирди. Бу галги гол муаллифи Сардор Раҳмонов бўлди. Лекин бугун омад биз томонда бўлмади. Ўйининг асосий вақтига қўшиб берилган 2-дақиқада Алкасер Испанияга ғалаба келтирди 3:2. Эътиборлиси ҳал қилувчи гол пенальтидан киритилди.

Уч миллат кубоги.
Испания — Ўзбекистон 3:2
Голлар: Сусо (56), Рубен (62), Алкасер (90+2, пен) — ЙЎлдошев (44), Раҳмонов (68)