Ҳозирги кунда кўпчилик мухлисларимизни "Бухоро" жамоаси 20 июнь куни бўлиб ўтадиган "Нефтчи" жамоасига қарши  Ўзбекистон чемпионатининг навбатдаги тур учрашувини қаерда, қайси стадионда ўтказиши ҳақидаги савол қийнаяпти.

Ҳаммага маълум, Бухоро шаҳрида Универсиада-2013 мусобақалари ўтказилди. Шаҳримиздаги бош арена ҳисобланган "Бухоро" спорт мажмуаси айнан мана шу мусобақа ўтказилиши муносабати билан қайта таъмирланди. Шу сабабли ушбу мавсум бошидан вилоятимизнинг бош жамоаси саналган "Бухоро" футбол клуби ўз уй учрашувларини турли стадионларда ўтказишга мажбур бўлганди.

Мана, Универсиада-2013 ҳам якунланди. Энди-чи? Жамоамиз ўзининг жонажон стадионига қайтадими? Мухлислар орзиқиб кутган дамлар етиб келдими? Ушбу саволларга бугун аниклик киритдик.

Демак, расман "Бухоро" жамоаси 20 июнь санасида бўлиб ўтадиган "Нефтчи"га қарши учрашувни янги таъмирдан чиққан "Бухоро" спорт мажмуасида ўтказадиган бўлди.

Бундан ташқари, мухлисларга ёқадиган яна бир янгилик бор. Учрашув бошланиш вақти нечада? Бухоро футболи тарихида илк бор учрашув кеч соат 19:00 да бошланади.

Бу омилларнинг барчаси барчамизга бирдек хуш кайфият бағишлаши аниқ. Шунинг учун 20 июнь барча-барча футбол мухлислари, мутахасислари, футболга ва умуман спортга меҳри бор инсонларни Бухоро вилоятининг бош аренасига таклиф этамиз.

Бундан ташқари, Бухорода фаолият юритадиган барча спорт журналистлари, телевидение, радио ходимларини ушбу учрашувга таклиф этамиз.

Учрашувларни иложи борича фаолроқ ёритайлик, ахир стадионга кела олмайдиган қанчадан-қанча ашаддий футбол мухлислари бор. Улар ҳам жамоамизнинг ўйинларидан баҳраманд бўлишга ҳақлилар. Вилоятимизда бир канча телеканаллар бор, айнан телевидение ҳар бир хонадонга ушбу футбол байрамларни етказишга қодир. Шу ва бошқа омилларни ҳисобга олиб, ўйлаймизки, бу йил телевидениемиз анча фаол бўлишади. Зеро, ўтган мавсум жамоа ўйинлари ТВ орқали деярли намойиш этилмади.

Барчани стадионда кутиб коламиз!