Эронда ҳақиқатдан ҳам байрам давом этмоқда. Маҳаллий матбуот ва ишқибозлар футболчи ва мураббийларни кўкка кўтариб мақтаётган бир пайтда, собиқ футболчи ва хатто мутахассислар ҳам четда туришгани йўқ. Эрон терма жамоаси собиқ аъзоси Воҳид Ҳошимиён журналистларга интервью берар экан, терма жамоа ва бош мураббий Кейруш шаънига ажойиб мақтовлар айтишни лозим топган.

"Ливан билан ўйиндаги ғалаба жуда аҳамиятли эди. Ливанликларга илк ўйинда мағлуб бўлгандик аммо терма жамоамиз бу сафар ўзини жуда яхши томондан кўрсата олди ва ғалабага эришди. 90 минг мухлиснинг "Озодий" стадионидаги қўллаб қувватлаши терма жамоа учун жуда фойдали ва керакли бўлди. Халқимиз кечаги ўйиндагидек жамоамизни қўллаб-қувватлашда давом этиши керак", дейди Ҳошимиён.

У сўзида давом этар экан, бош мураббий Карлос Кейрушни мақтаб ўтган: "Сўнгги ойлар давомида Кейрушга ҳам матбуот, ҳам мухлислар томонидан катта босим юкланди. Шунга қарамай, мураббий танқид ичида ўтган даврларни терма жамоа билан муваффақиятли босиб ўтди. У профессионал мураббий ва Эрон каби машҳур терма жамоаларда ҳам ички, ҳам ташқи ишларда нима қилиш лозимлигини жуда яхши билади".

Эслатиб ўтамиз, Осиёда ЖЧ саралашининг битта тур ўйинлари қолди. 18 июнь куни Эрон Ульсанда Корея термаси меҳмони бўлади.