Карло Анчелотти катта эҳтимол билан Бразилия терма жамоасини бошқаради.
65 ёшли мутахассис "Реал" бош мураббийлигидан кетиши кутилмоқда, деб ёзади The Athletic. Унинг фаолиятини давом эттириш учун кўплаб вариантлари бор - жумладан, Мадрид клубида бошқа лавозимга ўтиш. Аммо Анчелоттининг ўзи Бразилия терма жамоасини бошқаришни маъқул кўрмоқда.
Томонлар ўртасидаги музокаралар ривожланган босқичда.
Таъкидланишича, Бразилия футбол конфедерацияси (CBF) вакили "Реал" ва "Арсенал"нинг Чемпионлар лигасидаги жавоб ўйинига ташриф буюрган ва шу ҳафта Анчелотти билан учрашишни режалаштирган. Бироқ ташкилотдагилар бу маълумотни рад этишмоқда.
"Бу масала билан фақат эркаклар терма жамоалари бош координатори Родриго Каэтано ва президент Эднальдо Родригес шуғулланади. Иккаласи ҳам Рио-де-Жанейрода," - дейилади CBF хабарида.
Бразилия терма жамоаси июнь ойида Эквадор ва Парагвайга қарши ўйинларга қадар янги бош мураббий тайинламоқчи.
