"Барселона" вингери Рафинья Диас каталонияликлар учун 50-голини урди.
Бразилиялик футболчи шанба куни Ла Лигада "Сельта"га қарши ўйинда дубль қайд этди ва бир марта голли узатмани амалга оширди, бу эса "кўк-анорранглилар"га 4:3 ҳисобида ғалаба қозонишга ёрдам берди. Учрашув давомида Ханс-Дитер Флик жамоаси 1:3 ҳисобида имкониятни бой бераётганди.
Ҳал қилувчи гол 98-дақиқада Рафинья томонидан пенальтидан киритилди - бу гол футболчи учун юбилей бўлди.
"50-голим камбэкимизни амалга оширди. Уч йилдан камроқ вақт ичида "Барселона" сафида 50 та гол уриш мен учун ўзгача, буни ҳатто энг катта орзуларимда ҳам тасаввур қилмагандим. Қўллаб-қувватлаганингиз учун барчангиздан миннатдорман," - дея каталонияликлар ҳужумининг 28 ёшли етакчисининг сўзларини келтиради испан ОАВ.
