Яқинда ярим ҳимоячи Кевин де Брюйне "Манчестер Сити"ни тарк этишини эълон қилди. Маълум бўлишича, клуб раҳбарлари бельгиялик футболчи билан учрашган ва унга шартномани узайтирмаслик қарорини билдирган.
"Бу кичик шок эди. Менга йил давомида клубдан ҳеч қандай таклиф бўлмади ва клуб шундай қарорга келди. Албатта, мен бироз ҳайрон бўлдим, лекин буни қабул қилишга мажбур бўлдим. Тўғрисини айтсам, мен ҳали ҳам яхши даражада ўйнай оламан деб ўйлайман, аммо клублар қарор қабул қилиши кераклигини тушунаман," - дея де Брюйненинг сўзларини келтиради Daily Mail.
"Манчестер Сити" шанба куни "Эвертон"ни 2:0 ҳисобида мағлуб этди. Хосеп Гвардиол жамоаси айни дамда Премьер-лига турнир жадвалида тўртинчи ўринда бормоқда.
