"Челси" бош мураббийи Энцо Мареска келаси ҳафта охирида АПЛ доирасида "Эвертон"га қарши ўйин учун дисквалификация қилинди.
Педру Нетунинг "Фулхэм"га қарши ўйинда (1:2) қўшиб берилган дақиқаларда киритган голини нишонлаётганда, Мареска ўзининг техник майдонини тарк этди ва "Крэйвен Коттадж" стадионининг меҳмонлар сектори томонига югурди.
Бош ҳакам Энтони Тэйлор Марескага сариқ карточка кўрсатди, бу италиялик мутахассиснинг Премьер-лиганинг жорий мавсумидаги учинчи огоҳлантирилиши бўлди.
Аввалроқ ўша Тэйлор Марескани "Борнмут"га қарши ўйинда огоҳлантирган, "Ньюкасл"га қарши ўйинда эса Саймон Хупер Энцога сариқ карточка кўрсатганди.
Энди Мареска келаси шанба куни бўлиб ўтадиган "Эвертон"га қарши уй ўйинида жамоани бошқара олмайди. Энцонинг техник зонадаги ўрнини Вилли Кабальеро эгаллаши кутилмоқда.
