"Барселона" ҳимоячиси Жюль Кунденинг кетма-кет иштирок этган ўйинлар серияси якунланди.
Француз Ла Лиганинг сешанба кунги "Мальорка"га қарши ўйини қайдномасига киритилди, аммо захира ўриндиғида қолди. Шу тариқа, футболчи 2023 йилнинг ноябрь ойидан буён илк бор жамоасининг расмий учрашувини ўтказиб юборди. У деярли бир ярим йил давомида "Барселона" ва Франция терма жамоасининг барча ўйинларида, кетма-кет 104 ўйинда майдонга тушди.
Жюль Кунде жорий мавсум Ханс-Дитер Флик жамоасининг 51 та ўйинида қатнашиб, 3 та гол ва 8 та голли узатмага муаллифлик қилди.
