"Barselona" himoyachisi Jyul Kundening ketma-ket ishtirok etgan o‘yinlar seriyasi yakunlandi.
Fransuz La Liganing seshanba kungi "Malyorka"ga qarshi o‘yini qaydnomasiga kiritildi, ammo zaxira o‘rindig‘ida qoldi. Shu tariqa, futbolchi 2023 yilning noyabr oyidan buyon ilk bor jamoasining rasmiy uchrashuvini o‘tkazib yubordi. U deyarli bir yarim yil davomida "Barselona" va Fransiya terma jamoasining barcha o‘yinlarida, ketma-ket 104 o‘yinda maydonga tushdi.
Jyul Kunde joriy mavsum Xans-Diter Flik jamoasining 51 ta o‘yinida qatnashib, 3 ta gol va 8 ta golli uzatmaga mualliflik qildi.













